प्रा. (डॉ.) विजय खरे यांची सावित्रीबाई फुले पुणे विद्यापीठाच्या व्यवस्थापन परिषदेवर निवड

पुणे : सावित्रीबाई फुले पुणे विद्यापीठाच्या संरक्षण व सामरिकशास्त्र विभागाचे विभागप्रमुख प्रा. (डॉ.) विजय खरे यांची विद्यापीठाच्या व्यवस्थापन परिषदेवर (Management Council) सदस्य म्हणून नामनिर्देशनाद्वारे निवड करण्यात आली आहे.

महाराष्ट्र सार्वजनिक विद्यापीठ अधिनियम, २०१६ मधील कलम ३०(४)(झ) नुसार ही नियुक्ती करण्यात आली आहे. विद्यापीठाचे प्रभारी कुलसचिव प्रा. (डॉ.) प्रफुल्ल पवार यांनी पत्राद्वारे याबाबतची अधिकृत माहिती दिली.

व्यवस्थापन परिषद ही विद्यापीठाच्या प्रशासकीय व धोरणात्मक कामकाजातील महत्त्वाची अधिकार संस्था आहे. संरक्षण व सामरिकशास्त्र या क्षेत्रातील प्रा. डॉ. खरे यांचा दीर्घ अनुभव, शैक्षणिक योगदान आणि प्रशासकीय जाणिवेचा विद्यापीठाच्या कामकाजाला उपयोग होणार आहे.

महाराष्ट्र सार्वजनिक विद्यापीठ अधिनियम, २०१६ मधील कलम ६२(१) नुसार प्रा. डॉ. खरे यांच्या व्यवस्थापन परिषद सदस्यत्वाची मुदत ३१ ऑगस्ट २०२७ पर्यंत राहणार आहे.

प्रा. डॉ. विजय खरे यांच्या निवडीबद्दल विद्यापीठ प्रशासन, शिक्षकवर्ग तसेच विविध स्तरांतून त्यांचे अभिनंदन करण्यात येत असून, त्यांच्या अनुभवाचा विद्यापीठाच्या निर्णयप्रक्रियेत सकारात्मक उपयोग होईल, असा विश्वास व्यक्त करण्यात आला आहे.