३६ जिल्ह्यांत ‘क्रांतिसूर्य महात्मा ज्योतिराव फुले समता भवन’ उभारण्याची मागणी

मुंबई, दि. ३० सप्टेंबर २०२६ : महात्मा फुले यांच्या २००व्या जयंती वर्षानिमित्त राज्यातील ३६ जिल्ह्यांमध्ये सामाजिक न्याय विभागाच्या धर्तीवर इतर मागास बहुजन कल्याण विभागाचे ‘क्रांतिसूर्य महात्मा ज्योतिराव फुले समता भवन’ उभारण्यात यावे, अशी मागणी मंत्री छगन भुजबळ यांनी मुख्यमंत्री देवेंद्र फडणवीस यांच्याकडे केली आहे. यासाठी अर्थसंकल्पात निधीची तरतूद करून तो उपलब्ध करून देण्याची विनंती त्यांनी केली आहे.

या समता भवनांमध्ये इतर मागास बहुजन कल्याण विभागाची राज्य, विभागीय आणि जिल्हास्तरीय कार्यालये तसेच अधिकारी-कर्मचारी कार्यरत राहतील. त्याचबरोबर इतर मागास वित्त महामंडळ, महाज्योती आणि बार्टीसारख्या संस्थांची प्रशासकीय कार्यालयेही या संकुलात ठेवण्याचा प्रस्ताव आहे.

प्रस्तावानुसार, राज्यातील ३६ जिल्ह्यांमध्ये मुला-मुलींसाठीच्या शासकीय वसतिगृहांचाही या उपक्रमात समावेश करण्यात येणार आहे. त्यामुळे विभागाच्या विविध योजना आणि प्रशासकीय सुविधा एकाच ठिकाणी उपलब्ध होण्यास मदत होईल, असे प्रस्तावात नमूद करण्यात आले आहे.

 

२,४६० कोटींचा अंदाजित खर्च

प्रस्तावातील अंदाजानुसार, या बांधकामांसाठी एकूण २,४६० कोटी रुपयांचा खर्च अपेक्षित आहे. त्यामध्ये इतर मागास बहुजन कल्याण संचालनालय, पुणे येथील मुख्य कार्यालयासाठी १०० कोटी रुपये, पाच विभागीय कार्यालयांसाठी प्रत्येकी ४० कोटी म्हणजे २०० कोटी रुपये आणि ३० जिल्हा कार्यालयांसाठी प्रत्येकी ३० कोटी म्हणजे ९०० कोटी रुपयांची तरतूद अपेक्षित आहे.

 

तसेच ३६ ओबीसी शासकीय मुलींच्या वसतिगृहांसाठी प्रत्येकी २० कोटी रुपये, तर ३६ ओबीसी शासकीय मुलांच्या वसतिगृहांसाठी प्रत्येकी १५ कोटी रुपये खर्च अपेक्षित असल्याचे प्रस्तावात नमूद आहे. या सर्व बाबींची एकत्रित अंदाजित किंमत २,४६० कोटी रुपये आहे.

तीन टप्प्यांत निधीची मागणी

या बांधकामांसाठीचा निधी दोन वर्षांत तीन टप्प्यांत उपलब्ध करून देण्याची मागणी करण्यात आली आहे. त्यानुसार ८६० कोटी, १,००० कोटी आणि ६०० कोटी रुपये, अशा स्वरूपात निधी देण्याचा प्रस्ताव आहे.

याशिवाय राज्यात दहा ठिकाणी मुलामुलींसाठी शासकीय वसतिगृहे, कार्यालये आणि प्रशिक्षण केंद्रांच्या बांधकामासाठी मागील तीन वर्षांत नियोजन विभागाने शासकीय जागा उपलब्ध करून दिल्याचे पत्रात नमूद करण्यात आले आहे.

महात्मा फुले यांच्या २००व्या जयंती वर्षानिमित्त ३६ जिल्ह्यांत ‘समता भवन’ उभारण्याची ही संकल्पना प्रत्यक्षात आणण्यासाठी अर्थसंकल्पात तरतूद करून निधी उपलब्ध करून द्यावा, अशी मागणी मंत्री छगन भुजबळ यांनी मुख्यमंत्री देवेंद्र फडणवीस यांच्याकडे केली आहे.